అమ్మ అనేదీ అచ్చ తెలుగుమాటరా
జన్మ జన్మ కదే నిత్యవెలుగు బాటరా
ప్రేమకు పెట్టనికోట మమతల మల్లెలతోట
తనపిల్లల క్షేమమే పల్లపైన పాట
మధుర మధుర మధురమైన మాటరా : అమ్మా

కాలు మోపితే అమ్మ అవతరించె కాశీ
తానమాడితే అమ్మ తరించింది గంగ
మెరిసె లక్ష్మణరేఖ నడిచే భగవద్గీత
తొలి పలుకులు దిద్దుకుంది తెలుగుపాప ఆమ్మతో
తొలివెలుగులు దిద్దుకుంది తూర్పు అమ్మ చూపుతో
దేవుడైన చెప్పలేడు ఆ దేవత ఎంత గొప్పదో
అమ్మా - ॥అమ్మ॥

అనగనగా ఓ రాజకుమారి
వన్నెచిన్నెల వయ్యారి - నాట్యంలో మయూరి
యెందరెందరో రాకుమారులు, ప్రేమ బిక్షకై
అర్ధించారు నిరాశ చెందారు

డైలాగ్: ఇలా వుండగా ఓనాడు -
పెన్నిధి తనతల్లి అయిన పేదయువకుడొకడు
ఆ రంభలాంటి చిన్న చూచాడు
అందానికి కన్ను చెదిరి ఆ క్షణాన వళ్ళు మరిచి
ప్రేమ పిచ్చిలో పడ్డాడు పెళ్ళిచేసుకో మన్నాడు!

డైలాగ్ : అప్పుడా సుందరి ఏమడిగిందో తెలుసా ?
కానుకగా కన్నతల్లి గుండె కోరెనా చిన్నది
తేలికగా తెస్తా లెమ్మన్నాడు - ప్రేమ ఎంతగుడ్డిది
ఆ కామమెంత చెడ్డది

కన్నుల కడవెలుగు దాచి కన్న కడుపునే తలచి
తలవాకిట నిలచినదా తల్లి కన్నతల్లి
వచ్చిన బిడ్డనుచూచి వెచ్చని మమతలుపోసి
వండిన అన్నము పెట్టెను - నిండుగుండెతో
ఆ తల్లి బిడ్డకడుపు నిండుగా మళ్ళీ మళ్ళీ
ఇటు కన్నతల్లి మమకారము
అటు కన్నెపిల్ల శృంగారమూ
ఇటు తల్లిగుండె గుడిగంటలూ
అటు కన్నె కంటి చలిమంటలూ
ఇటు నెత్తురు - అటు అత్తరు
ఇటు త్యాగము - అటు భోగము
ఉన్మత్తుడై, చలచిత్తుడై, కామాంధుడై, పాపాత్ముడై
పుత్రరూపమున శత్రువై, మాతృ హత్యనే చేశాడు
జన్మనిచ్చిన తల్లినే చంపుకున్నాడు
కన్నుమిన్ను కానక, కన్నతల్లి గుండె కానుక
కన్నెపిల్ల కే ఇవ్వగా !

కన్నుకానక పరుగులెత్తగా - కాలుజారి పడిపోయాడూ
చావు దెబ్బతిని అమ్మా అమ్మా అమ్మా అంటూ
గావు బొబ్బలే పెట్టాడు

డైలాగ్ : అప్పుడు ఆ తల్లి గుండె యెమన్నదో తెలుసా?
నాయనా దెబ్బతగిలిందా ? జాగ్రత్త నాయనా
నా ఆయుష్షు పోసుకొని నూరేళ్ళు చల్లగా
వర్ధిల్లు నాయనా -

అమ్మ కోరేదీ ఒకే ఒక్క మాటరా
అయిదూ ప్రాణాలుపోసి నవమాసాలు మోసిన
తనకు అప్పు పడ్డందుకు
తలకు కొరివి పెట్టమనీ
తన ఋణమును తీర్చమనీ
ఎన్ని జన్మలెత్తినా తనబిడ్డయి పుట్టమనీ
అమ్మా అని పిలవమనీ -
మాతృదేవోభవా ! మాతృదేవోభవా !
మాతృదేవోభవా |