శాంత - వసంత్- శశి & కోరస్

శాంత:
చిలకలార! ఎలకలార ! మిడతలారా!
పో పొండి హేయ్ రాకండి,
దూర దూరముగ పొండి,
ఓ, చేతగాని పలుగాకులారా,
చెంతకు రాకండి; మీరంతం గాకండి ...... పోపొండి॥

ఒంటికి మంటికి ఒకటే ధారగ
చెమటలు కార్చేమూ, మేము, శ్రమముల కోర్చేమూ,
యింటిలిపాదిన కంటికి రెప్పై
కాచుకు పెంచాం మాపంట...... పోపొండి!!

వసంత్:
ఎండనకుండా వాననకుండా
కండలు కరిగే కష్టంచేసి
పండించే మిది మా పంట
దండుగ తిండికి రాకండి...... పోపొండి!!

అంతా:
మట్టిని మట్టయి, చెట్టుల చెట్టయి
పుట్టా మిక్కడ పెరిగాము (మేము)
గట్టిగ నాగలి పట్టి చేలతో...
పెట్టే మమ్మకు హారాలూ
కట్టే మమ్మకు జోహర్లు...... పోపొండి!!

శాంత:
వారి ధర్మమున వీరి ధర్మమున
ఊరక తిని తిని తెగ బలిసి
బోరలు విరుచుకు బారు బారులై
తేరగ పైబడి తింటారా...... పోపొండి ॥

శశి:
ఆయాసంలో, వుల్లాసంలో
అమ్మకు మేమే మాకీ యమ్మే
అమ్మా యంటే ఆనందంతో
'ఆ' యని పలుకును మా భూమి
మా భూమి, మా భూమి.

మా భూమి, మా భూమి.