నిండు కుండలా నీళ్లోసుకుంటాది నీలాల కొండ
పండులాంటి ముద్దు పాపల్ని కంటాది తెల్లారకుండా
పుట్టినోడల్లా సూరీడంట పుడమితల్లికాడు కొడుకేనంటా
అమ్మ కడుపులో ఆడేదేమో తొమ్మిది నెలలంటా
దుమ్ములోన కలిసిపోయేటందుకు నూరేళ్ళ గడువంట
ఇది బ్రతుకమ్మ నడకంట
ఇది బ్రతుకమ్మ నడకంట
నిండు కుండలా నీళ్లోసుకుంటాది నీలాల కొండ
పండులాంటి ముద్దు పాపల్ని కంటాది తెల్లారకుండా

అమ్మ చేతులా మొలతాడు కడితే మొనగాడైనోడు
ఆ మొలతాడు కొలతే మెడ తాళి కట్టి ఆలి మొగుడౌతాడు
పేగు మడతలో ఊగులాడతా ఉలికులికి పడతాడు
చిలిపి గెంతులా బంతిలా చిరు డొక్కన తంతాడు
తప్పటడుగులా....
తప్పటడుగులా నడకతోనే గొప్పోడినంటాడు
నిప్పులోన కలిసిపోయేనాడు
తలకొరివి పెట్టంగా వచ్చానంటాడు
నిండు కుండలా నీళ్లోసుకుంటాది నీలాల కొండ
పండులాంటి ముద్దు పాపల్ని కంటాది తెల్లారకుండా

పుట్ట మీద చెట్టు పురుడోసుకుంటే పువ్వు పూసేనంట
ఆ పువ్వులోనే ఒక బ్రహ్మ దేవుడు పుట్టుకొచ్చేనంట
అందమైన జనమ కోసమే ఆదిశక్తి పుట్టేనంట
అండ పిండముల తల్లిగా అది ఆడదయ్యేనంట
కట్టుకున్నదే..
కట్టుకున్నదే కనలేనంటే కాలమేడ్చెనంట
బిడ్డ పాపల్లేని గొడ్రాలైతే ఈ భూచక్రమెట్టా తిరిగేనంటా?

నిండు కుండలా నీళ్లోసుకుంటాది నీలాల కొండ
పండులాంటి ముద్దు పాపల్ని కంటాది తెల్లారకుండా
ఇది బ్రతుకమ్మ నడకంట
ఇది బ్రతుకమ్మ నడకంట
ఇది బ్రతుకమ్మ నడకంట
ఇది బ్రతుకమ్మ నడకంట