ఎందరు ఉన్నారూ మీలో
ఎందరు ఉన్నారూ !
నీతికి నిలబడువారూ
నిందకు భయపడువారూ !

వచ్చానయ్యా ! వచ్చానూ
వరాల లక్ష్మిని వచ్చానూ
మక్కువగలిగిన వారికీయగా
చక్కని కానుక తెచ్చానూ

బ్లాకుమార్కెటియర్ __

వచ్చానమ్మా వచ్చానూ-నీ
కానుక కోసం వచ్చాను
ఆ కానుక నాకు యిచ్చావంటే
కళ్ళకద్దుకొని పూజిస్తాను
సత్రాలను కట్టించానూ
చలివేంద్రల పెట్టించానూ

గుడికి శిఖరమెత్తించానూ
బడిలో పప్పులు పంచానూ
ఎలక్షన్లలో నిలిచినవాళ్ళకు
ఎన్నో చందాలిచ్చాను

బ్లాకు మార్కెట్లు చేశావు
పాలడబ్బాలు దాచావు
శిక్షలు ఫైనులు తప్పుకొనంగా
బడానాయకుల మేపావు
చాలయ్యా నీ వేషాలు
జాతికి నువ్వు వేరుపురుగువు

జైళ్ళలోన పడుకున్నాను
దేవతాపులుసు తిన్నాను
మీటింగులలో ముందుకు దూకి
ఎన్నో లెక్చరు లిచ్చాను
యిల్లూవాకిలి వదలిపెట్టి నే
ప్రజా సేవలో పండాను

ప్రజా సేవకుడనన్నావు
ప్రజలకు టోపీ పెట్టావు
పర్మిట్లెన్నో సంపాయించి
పైసాలను తెగ తిన్నావు
దేశం పేరు చెరిచావు,
పోపో ఎందుకు అరిచేవూ

బక్కచిక్కినా రై తులం
దిక్కులేని కూలీలమూ
గంపెడు పిల్లల కన్నాము
కరువు తోటి చస్తున్నాము
మితముగ పిల్లలు కావాలి
మా బ్రతుకులు హాయిగ జరగాలి

భారతదేశపు సంపద పెంచగ
బంగారము పండించండి
పండిన పంటను దాచుకోక యీ
ప్రపంచాన్ని బ్రతికించండి
మీకోరికలను తీర్చెద
కరువుమాపి కాపాడెద
ఇదుగో కానుక పట్టండీ