ఎన్నెన్నో అందాల బంగారు చిలుక
నీ మోము చిన్నబోయెనా
ఆ ముద్దు ఈ ముద్దు సరిహద్దు చెరిగి
నీ గుండె బద్దలాయెనా

నీలోని ఆశలే… మోసాన్ని చేసెలే
నువు కన్న కలలే… కడతేరి ముడిసెలే
స్నేహాల బాసలే… ద్రోహాలు చేసెలే
చిరునవ్వులన్నీ చితులాయే

ఎన్నెన్నో అందాల బంగారు చిలుక
నీ మోము చిన్నబోయెనా

ఓ ఓ, ఏ దారి లేదుగా… ఎదురాయె ఓ దగా
వ్యధలే మూగగా… ఎద మూగదాయెగా
ఇన్నాళ్ళ వేదన… ఈ మౌన రోదన
అర్ధాలే లేని వ్యర్ధంగా మారెగా

చెలివో శిలవో… పోల్చే వీలు లేదా
కలవో కధవో… నీవనుకోమా
అలలై ముసిరే… అలనాటి జ్ఞాపకాలే
కలకే శిలువే… వేసె సుమా

ఎన్నెన్నో అందాల బంగారు చిలుక
నీ తోడు వీడిపోయెనా
ప్రేమించి ప్రేమించి ప్రాణాలు అలసి
నీ గుండె బద్దలాయెనా