(నవంబర్ 30, 2021 న చేంబోలు సీతారామశాస్త్రి గారు స్వర్గస్తులయ్యారు, ఈ సందర్భంగా ఈ పాటని గుర్తుచేసుకుంటూ, కాస్త ప్రశ్నించినట్టుగా అనిపించినా ఇరవైఐదు ఏళ్ళ క్రితం సిరివెన్నెల గారు రాసిన ఈ పాట నేటికీ వర్తిస్తుంది. సంవత్సరాలు గడచిపోతున్నాయే కానీ పరిస్థితులు మారట్లేదు. సమాజం ఉన్న పరిస్థితిని స్పష్టంగా కళ్ళముందు నిలిపే ఈ పాట చాలా మందికి ఇష్టం. ఈ పాటని సిరివెన్నెల గారిపై చిత్రీకరించాలనుకోవడం ఒక మంచి ఆలోచన, కవి ఆవేశాన్ని మరింత ప్రభావవంతంగా నేరుగా ప్రేక్షకులకు చేరవేయగలిగాడు దర్శకుడు రాంగోపాల్ వర్మ
ఎస్.పి. బాలు గారి గళం నుండి ఆవేశం తో పాడిన ఈ పాట ఎన్ని తరాలైన ప్రశ్నిస్తుంది మనల్ని.)

నిగ్గదీసి అడుగు ఈ సిగ్గులేని జనాన్ని
అగ్గితోటి కడుగు ఈ సమాజ జీవశ్చవాన్ని
మారదు లోకం మారదు కాలం
దేవుడు దిగిరానీ ఎవ్వరు ఏమైపోనీ
మారదు లోకం మారదు కాలం

గాలివాటు గమనానికి కాలిబాట దేనికి
గొర్రెదాటు మందకి నీ జ్ఞానబోధ దేనికి
ఏ చరిత్ర నేర్చుకుంది పచ్చని పాఠం
ఏ క్షణాన మార్చుకుంది చిచ్చుల మార్గం
రామబాణమార్పిందా రావణ కాష్టం
కృష్ణ గీత ఆపిందా నిత్య కురుక్షేత్రం

నిగ్గదీసి అడుగు ఈ సిగ్గులేని జనాన్ని
అగ్గితోటి కడుగు ఈ సమాజ జీవశ్చవాన్ని
మారదు లోకం మారదు కాలం

పాత రాతి గుహలు పాల రాతి గృహాలైనా
అడవి నీతి మారిందా ఎన్ని యుగాలైనా
వేట అదే వేటు అదే నాటి కథే అంతా
నట్టడవులు నడివీధికి నడిచొస్తే వింతా
బలవంతులె బ్రతకాలని సూక్తి మరవకుండ
శతాబ్దాలు చదవలేద ఈ అరణ్య కాండ

నిగ్గదీసి అడుగు ఈ సిగ్గులేని జనాన్ని
అగ్గితోటి కడుగు ఈ సమాజ జీవశ్చవాన్ని
మారదు లోకం మారదు కాలం

దేవుడు దిగిరానీ ఎవ్వరు ఏమైపోనీ
మారదు లోకం మారదు కాలం