పల్లవి:
పొద్దు వాలిపోయాక
ఊరు సద్దుమణిగాక
ఒంటరిగా అత్త కొడుకు రమ్మన్నాడు.
నన్ను రమ్మనీ వాడేమొ రాకున్నాడు
ఎంతపని చేశాడమ్మ పిల్లాడు...

చరణం: 1
నీటిమీద రాసిపోతాను
నీమీద నేను అలిగానని
గాలితో చెప్పిపోతాను
మాటలన్ని గాలివేనని
వెదురు గుబురు వినిపిస్తుంది
నేనెన్నిసార్లు నిట్టూర్చానో
ఇసుక తిన్నె చూపిస్తుంది
ఇక్కడెంత సేపు కాసుకున్నానో

చరణం: 2
వానమబ్బు కదిలొస్తుందీ
నా నడక నీకు గురుతొచ్చేలా
మెరుపు తీగ తళుకు మన్నది
నావంటి మెరుపు నువు చూసేలా
వానజల్లు రాబోతుందీ
నా గుండెలలో వలపు జల్లుగా
ఆకాశం చీకటైనది
నీ ముద్దు లెవరు చూడకుండగా....