పూవై విరిసే ప్రాణం
పండై మురిసే ప్రాయం
రెండూ ఒకటే నాణానికి బొమ్మా బొరుసంతే
తీసే ఊపిరి ఒకటేగా వేషం వేరంతే
నడకైనా రాని పసి పాదాలే అయినా
బతుకంతా నడిచి అలసిన అడుగులే అయినా
చెబుతాయా చేరే మజిలీ ఏదో

ఒక పాత్ర ముగిసింది నేడు
ఇంకెన్ని మిగిలాయో చూడు
నడిపేది పైనున్న వాడు
నటుడేగా నరుడన్న వాడు
తానే తన ప్రేక్షకుడు అవుతాడు
ఎవడో ఆ సూత్రధారి
తెలుసా ఓ వేషధారి
మళ్ళీ మళ్ళీ వందేళ్లు ఎప్పుడు సరికొత్తే
ఎప్పటికైనా తెలిసేనా బతకడమేంటంటే