తండ్రి పంపుననేగి తాటక బరిమార్చి
తపసియాగము గాచే ధర్మమూర్తి
ఆడుదానిని జంపె నదియేటి ధర్మంబు
చెప్పు కొనుటకైన సిగ్గులేదే

శివధనుః ఖండన మవలీల గావించె
భుజబలశాలియా పుణ్యమూర్తి
పుచ్చిన విలుద్రుంప భుబబలంబగునయ్య
దంభంబులిక చాలు తగ్గవయ్య

వరపరాక్రముడైన వాలిని తెగటార్చి
సూర్యనందనుబ్రోచె శౌర్యధనుడు
చాటు మాటున దాగి శాఖాచరుని ద్రుంచె
శౌర్య లక్షణమిదా చాలునయ్య
దశకంఠు దునుమాడి తమ్ముని గాపాడె
కారుణ్యమూ ర్తి రాఘవ విభుండు
గర్భవతిని సతిని కానల బోద్రోలె
కఠినాత్ము డతనికి కరుణ గలదె
బాలురకు ధర్మసూక్ష్మ మే పగిది తెలియు
తప్పు శ్రీరాము నెదిరింప తగదు మీకు
ఎర్ర గురివింద తన నలు పెరుగనట్లు
చెప్పుచున్నావు మీరాము గొప్పలెల్ల
చాలు చాలింక ధర్మ పన్నాలుమాని
చేవగలదేని యుద్ధంబు నేయవయ్య