అన్యాయం అక్రమాలు - దోపిడీలు దురంతాలు
ఎన్నాళ్లని ఎన్నేళ్లని నిలదీసినదీ రోజు
అణగారిన శ్రమశక్తిని ఆవేశం ఊపిరిగా
కదిలించినదీ రోజూ రగిలించినదీ రోజు
మేడే ...........మేడే - నేడే - మేడే ॥ మేడే॥

సమభావం మానవాళి గుండెలలో నిండగా
సకలదేశ కార్మికులకు ఈనాడే పండగా
లోకానికి శ్రమ విలువను చాటిన రోజు
ఇది చీకటిలో చిరుదివ్వెలు వెలిగిన రోజు
మేడే.......... ... మేడే - నేడే - మేడే ॥ మేడే||

వేదనలూ - రోదనలూ - అంతరింప జెయ్యాలని
బాధల కేదారంలో శోధన మొలకెత్తిందీ
చిరకాలపు దోపిడిపై తిరుగుబాటు జరిగినపుడు
చిందిన వెచ్చని నెత్తురు కేతనమై నిలిచిందీ
మేడే .... ......... మేడే - నేడే - మేడే ॥ మేడే ॥

భావనలో నవచేతన - పదునెక్కిన ఆలోచన
రేపటి ఉదయం కోసం రెప్పలు విప్పాయి
బిగిసిన ఈ పిడికిళ్లు - ఎగసిన ఆ కొడవళ్లు
శ్రామిక జన సారధిగా క్రమించమని అడిగాయి
మేడే ......... .... మేడే - నేడే - మేడే ॥ మేడే॥

ఎన్నెన్నో దారులలో - చీలిన మన ఉద్యమాలు
ఎన్నెన్నో తీరులలో చెమటోడ్చే శ్రమ జీవులు
ఐక్యంగా నిలవాలి - కదనానికి కదలాలి
సామ్యవాద సాధనకై సమరం సాగించాలి
మేడే ... .... .... మేడే - నేడే - మేడే ॥ మేడే॥