మంచి బియ్యములోన మట్టిబెడ్డలు జేర్చి
బొర్ర పెంచిన యట్టి ముచ్చు యితడు
ప్రతిదిన మేడు గంపల మట్టి గరిపించి
గడ్డి మేయించుడీ ఖలుని చేత

పాల డబ్బాలనే బ్లాకు మార్కెటు జేసి
పసివారి జంపిన పాపియితడు
సలసల కాగేటి చమురులో పడదోసి
మన్వంతరము పాటు మాడ్చు డితని

లంచాలు తెగమేసి లక్షలు గడియించి
దేశాన్ని అమ్మిన దేబె యితడు
సీసమ్ము కరిగించి చెవినిండుగా బోసి
కొరడాల బాదుడీ క్రూరమతిని

నోట్లు పెట్టుబడిగా ఓట్లు సంపాదించి
పార్టీలు మారిన భ్రష్టు డితడు
ఉక్కు ముక్కుల కాకులుక్కు మీరి పొడుచు
తరి ముంచుడితని వైతరణిలోన

పాపులధికులై భూమికి భారమగుట
రౌరవాది నరకముల ప్రళయ భీక
రాగ్ని కీలలన్ దహియించి అయ్యధముల
పాతకాల్ కడిగించుడో దూత లారా!