పువ్వులో గువ్వలో వాగులో తీగలో
అంతట నీవేనమ్మా
అన్నిట నీవేనమ్మా

నీ ఒడిలో నన్ను దాచుకోవమ్మా
నీ పాపగ నన్ను చూచుకోవమ్మా -
కొమ్మ కొమ్మపై కుసుమంలో
కమ్మని తేనెవు నీవే నీవే
జాలి గుండెతో జల జల పారే
సెలయేరువు నీవే
నింగిలో నేలలో రంగు రంగుల హరివిల్లులో ....

సీతాకోక చిలుకలతో
చేరి వసంతా లాడేను
బంగరు వన్నెల జింకలతో
చెంగు చెంగున యెగిరేను
కొండలో కోనలో తోట బాటలో

నీ చల్లని నీడే నా యిల్లు
ఈ మూగజీవులే నా వాళ్ళు
అంతులేని నీ అందాల లోకం
అంతా నాదేనమ్మా -
మనసులో మమతలో కనులలో నా కలలలో నీవే