(గోపికలు) : కన్నెల మనసులు దోచుకు పోయిన
కన్నయ్య ఏడమ్మా
పున్నమి జాబిలి చిన్నబోయిన
వన్నెల కాడమ్మా
మురళీ గానము మధురిమలో మేము
కన్నులు మూయంగా
అల్లరి కృష్ణుడు అందాల కృష్ణుడు
చెంగున మరుగాయె

కృష్ణయ్య లేని తనువులు మేము
మోయంగ లేమమ్మా
ఆతని వేణువు మాధుర్యమే మా
ఊపిరి నిలుపమ్మా
ఆ కాలి మువ్వల సవ్వడులే మాకు
చేతన మిచ్చేది
ఆతడు లేని అరక్షణమైన
జీవించ లేమమ్మా

ఓ భూమాతా నీ వైన మా స్వామి జాడ
పరికించి తెలుపమ్మా
ఓ పున్నాగ, కదంబ, మారేడు, మామిడి
మీరైనా చెప్పండి
ఓ మల్లీ జాజీ సంపెంగ పూలారా
వనమంతా వెదకండి
ఓ వన మయూరమా శిఖిపింఛ మౌళిని
వెదకి తేవమ్మా

(కృష్ణుడు...)
ప్రతి తరవు నందు నిలిచింది నేనేగా నేనేగా…
ప్రతి పులుగు నందు చేతనము నేనేగా.. నేనేగా..
ప్రతి పూవు నందు పరిమళము నేనేగా… నేనేగా…
భువిలోన దివిలోన ప్రతి అణువులోన నేనేగా… నేనేగా…
ఓ చెలులారా మీ హృదయాలలో
నేనెపుడూ బందీగా వుంటాను
కన్నెల మనసున నిలచి పోయిన
కన్నయ్య వీడమ్మా
పున్నమి జాబిలకీ కన్నెల సొగసుల
చందము ఏదమ్మా