పాలబుగ్గల చిన్నదాన్ని
పెళ్లిగాని కుర్రదాన్ని - రాజా

ఓరగంట చూడవదు
ఒంటిపై చెయ్యెయ్యవద్దు
తల్లి చాటు పిల్ల నయ్యా
అల్లరిపాలవుదునయ్యా

కోడెవయసు చిన్నవాణ్ణి
జోడుకోరి వున్నవాణ్ణి
చదువువుంది సరదావుంది
సంపాదించే ఛాన్సువుంది
తల్లి దండ్రీ కాదన్నా నిను
పెళ్ళియాడే దమ్ము వుంది

బావయ్యో - పోవయ్యో
చదువుకున్నా చేసేది ఏముంది?
గుమాస్తావైతే ఒరిగేది ఏముంది?
నీకువచ్చే నెల జీతాలు
సోకులాకే చాలవయ్యా

దొంగచాటు వ్యాపారం కనిపెట్టానే
టాక్సులేనిడబ్బుబాగ కూడబెట్టానే
నైలానుచీరలు, పౌడర్లు వాచీలు
బంగారు బిస్కెట్లు - బ్రాందీలు విస్కీలా

కొల్లకొల్లగ చేరవేస్తా
చూడుపిల్లా నా తడాఖా
పోవయ్యో - దేవయ్యో
సాగినప్పుడు జల్సాగవుంటది
దొరికిపోతే జైలే రమ్మంటది
దొంగబతుకు చాలునోయీ
తప్పుకోవోయ్ దగులుబాజీ

కల్లా కపటంలేని రైతుబిడ్డను
నా కష్టంతో దేశాన్ని బ్రతికిస్తాను
దేశానికి ప్రాణమిచ్చు వీరజవాన్నూ
భరతభూమి పరువునిల్పు శూరజవాన్నూ

జై జవాన్ జై కిసాన్
ఇద్దరిద్దరె మొనగాళ్ళుమీరు
మీరులేనిదె దేశమ్ము లేదు
పసిడిపంటలు పండించెదవు నీవు
మన స్వతంత్రము నిలబెట్టెదవు నీవు
జాతికెల్లా అన్నదాతవు నీవు
మాతృభూమికి ప్రాణదాతవు నీవు
వీరపుత్రుని వరింతునయ్యా
వీరపత్నిగ గర్వింతునయ్యా