స్వర్గం నరకం చేరే దెవరో
చెప్పడమెందుకురా
నోచిన పుణ్యం చేసిన పాపం
స్వర్గమొ - నరకమొ తేల్చునురా

పట్టు పరుపుపై పుట్టినవాడు మట్టిలో కలియునురా
మట్టినేలపై పుట్టినవాడు గిట్టక మానడురా
ఉన్నన్నాళ్ళు కట్టిన మూటలు లెక్కకు రావురా
పోయేనాడు నీ వాళ్ళెవరో లెక్కకు వచ్చునురా ॥స్వర్గం ॥

పరుల మేలుకై బ్రతికిన వాడే పరమ పావనుడురా
ఆ పుణ్య పురుషుడే కీర్తిశేషుడై తరలి వెళ్ళుతుంటే
ఎంతమంది తమకంటినీటితో తర్పణ మిస్తారో
అంతటి పుణ్యం ఆ జీవుడికి స్వర్గం యిచ్చునురా ॥స్వర్గం॥

నలుగురి కడుపులు కొట్టే పాపికి ఈడ్చే దిక్కే వుండదురా
ఏడ్చే కన్నే మిగలదురా నరక కూపమే ఖాయమురా
ఊరికి చివర వుత్తిరమందున వుంది రుద్రభూమి
మంచి మిగిల్చి కాటికి చేరిన మరణం కాదు సుమీ
అదియే జీవన్ ముక్తి సుమీ ॥స్వర్గం॥